දූවිලි සිහින | Dreams of the Dust (Part 01)

ඇත්තටම ඕනෙම පොතකට පෙරවදනක් තියෙන්න පුළුවන්. හැබැයි හැම කතාවකටම පෙර වදනක් ඕනෙමයි කියලා කෙනෙක්ට තර්ක කරන්න හිතෙනවා නම් ඒක ඇත්තටම ලොකු මෝඩ කමක් . ඒත් නවකතාවකට පෙර වදනක් තියෙන්න ඕනෙ කියලා කෙනෙක්ට තර්ක කරන්න ඕනෙ වුණත් හැම කතාවක්ම නව කතාවක් කියලා කියන ඒක ඊට වඩා මෝඩකමක්. මේක නවකතාවක් නෙවෙයි. මම මේ කියන්නෙ මගේ කතාව. මගේ චරිතය ගැන කියන හින්දා මේක චරිත කතාවක් කියලා කෙනෙක්ට කියන්න පුළුවන්. ඒත් මම ඒකට කැමති නැහැ. මේකට නමක් නොකියනවා නම් තමයි හොඳ. මේක ටිකක් දිගයි. ඒ නිසා මට ටිකක් ලියන්න වෙයි.

මගේ නම ෂේන්යා. එහෙම මේ කතාව පටන් ගත්තොත් ටිකක් අමු වැඩියි වගේ. හුඟක් කතා එහෙම පටන් අරගන්නවා. මේ කතාව පටන්ගන්න ඕනෙ මුලින් නම්, මම කන්දෙ ලෑලි ගෙදර ඉඳන් පල්ලෙහාට දුවගෙන එන තැනින් පටන් ගන්න ඇත්තටම පුළුවන්. ඒත් මම වැඩිවිය පැමිණි විත්තිය මට කලින් කන්‍යා සොයුරියක් දැනගත්ත වග කියලා පටන් ගත්තොත් මේ කතාව ටිකක් ආකර්ෂණීය වේවි. ඒත් ඇත්තටම කතාවෙ හොඳම හරිය පටන් ගන්නෙ ෂේන්යාගෙ කසාදෙන්. ඒ කියන්නෙ මගේ විවාහයෙන්. ඒක සිද්ධ වෙන්න නියමිත හෙට.

මම විවාහ වෙන්නෙ කතන්දර පොත් වල ඉන්න ෂේන්යාගෙ සුලබ පෙම්වතා පාවෙල් එක්ක නොවුණත් එයාගෙ නම ඊට ටිකක් විතර සමානයි. එයා සැමුවෙල්. සැමුවෙල් ගෙ නම මේ පැත්තට සුලබ නැතත් මට හිතෙන්නෙ එයා සලඹයෙක් කියලා. අර පුංචි ලංතෑරුම් එළියකට පිස්සුවෙන් ඇදීගෙන ගිහින් විනාස වෙන මෝඩ සතෙක් කියලා. කොහොම නමුත් කතාව මම මුල ඉඳන් පටන් ගන්නම්. කතාව මැදින් පටන්ගත්තොත් සැමුවෙල්ගෙ හමුවීම කියන එක මඟ හැරෙන්න පුළුවන්. ඒ වගේ ම මයිකල්ට මොකද වුණේ කියලා ඔයාලාට අපැහැදිළි වෙන්නත් පුළුවන්.

කොහොම නමුත් මම ඔයාලාට කතාව කියන්නම්. ඔයාලාට ඕනෙ නම් මගේ නම කැමති විදියකට වෙනස් කරගන්ඩ.මගේ රූපෙ ආසා විදියකට මවා ගන්ඩ ඔයාලාට නිදහස තියෙනවා. නමුත් මම කියන්ඩ ඕනෙ..සැමුවෙල් ගෙ චරිතය ඔයාලා මවා ගනිද්දි එයාට ලොකු බඩක් දමන්න එපා. මොකද මම කසාඳ බිඳින මිනිහට ලොකු බඩක් තියෙනවාට මම කැමති නෑ.

මේ කතාව සිද්ධ වුණේ රුසියාවෙ කියලා හිතනවා නම් ඒක වැරදියි කියලා කියන්න බැහැ වගේම හරිය කියලා කියන්නත් මට ඕනෙ කරන්නෙ නැහැ. මොකද ඕනෙම රටක ඕනෙම තැනක ඕනෙම විදියක අය, ඕනෙම කාලෙක දී ඉන්න පුළුවන්. ඒකයි...අපි කාගෙ කාගෙත් ජීවිත පිස්සුවක් කියලා අපි හොඳින් තේරුම් ගන්න ඕනෙ. හෙට විවාහ වෙනවා කියන එක ඇත්තටම බය නැතත් අම්මා කෙනෙක් වීම නම් ටිකක් භයානකයි. බැඳපු දවසෙම අම්මා කෙනෙක් වීම ඊට වඩා හුඟක් භයානකයි.