8/23/16

-265- කර්ණගේ විලාපය

එදා මං ආවෙ ඔබ අත රැගෙන යන්ට නොව
මිතුරාගෙ උදව්වට පමණමයි..
ඒත් මාධව් දුන්නු ධර්ම අභියෝගයෙන්
යළිත් මා ආවේ මා පිණිසමයි..
නිල් අහස මහ පොළව යා කෙරූ මායාව 
එක ලෙසින් දුටුවෙ ඇස් හින්දමයි
කිසිවෙකුට තවදුරට ජයක් හිමි නොවන
ඒ තරඟයේ ජය තිබුණෙ මා ළඟයි..


කිදිම දවසක නුඹේ ඇස් ඉදිරියේ නුදුටු
කුමරුවකු ගැන ඇසූ නාමයෙන්
මුසපත්ව සිටිය වග නොදන්නෙමි සොඳුරියේ
ඔහු කෙරේ බැඳි නොතිත් ප්‍රේමයෙන්..
ස්වයංවර මංගල්ලෙ දකින්නට රැස්ව සිටි
මිනිස් කැළ අභිමුවේ හදිසියෙන්
අවමාන කළේ මට රථාචාරියා යැයි
ඔබයි පංචාලියේ වෛරයෙන්....
ගෞරවය සිඳෙද්දී දුන්න මම අත් හළෙමි
ඉලක්කය බොඳවෙලා පෙනුණා..
ඉරත් වෙව්ලුම් කන්න හද වේදනා දෙද්දි
නුඹ අර්ජුන ගෙ දෑතෙ වෙලුණා..
කල් ඉකුත් වෙලා ගිය තුවාලය රිදුම් දුණි.
අනේ මම කැළැල් උඩ දැවුණා..
මගේ ගොරහැඬි වචන තුළ නිතර නුඹ නමට
ඉකිබිඳපු කඳුළු බිඳු තිබුණා..

- කතාපුවත -
දුර්යෝධන් සමඟ ඔට්ටු අල්ලන පාණ්ඩව වැඩිමහල් සොයුරු යුධිශ්ධීර් සියල්ල පරාජය වෙයි. එබැවින් ද්‍රෝපදී නම් කුරු වංශයේ කුලදියණිය සහ පාණ්ඩවයන් ගේ බිරිඳ වන ද්‍රෝපදී දාසියක් ලෙස පාවා ගැනීමට දුර්යෝධන් සැරසෙයි. දුර්යෝධන් තම සොයුරු දුෂ්ශාසන් හට ඇය නිරුවත් කරන ලෙස අණ කරයි. එහිදී පාණ්ඩවයන් එසේ නොකරන්නයි විරුද්ධ වද්දී අංග රජු වන කර්ණ නැගී සිටියි. ඇය පිරිමින් පස්දෙනෙකු සමඟ දිවි ගෙවන බැවින් ඇය වෛශ්‍යාවකට වඩා වෙනස් නොවන බව ඔහු පවසයි.
මේ සිදුවීම සිදුවන්නට වසර ගණනකට පෙර පංචාලයේ දි ද්‍රෝපදී ගේ ස්වයං වරය සිදු විය. එහිදී මායාවකින් තනා තිබූ දුනු තරඟයෙන් ජයගන්නාට ද්‍රෝපදී විවාහ කරගැනීමට වරම් ලැබිණි. ක්‍රිෂ්ණා දෙවිඳුන් විසින් ඇය විවාහ විය යුත්තේ අර්ජුනා සමඟ බව යැයි පෙර සිටම ද්‍රෝපදී ට කාවද්දා තිබිණි. එම නිසා එහිදී ඇය අර්ජුනාගේ පැමිණීම අපේක්ෂා කරමින් සිටින විට කර්ණ තරඟයට පිවිසියේය. මුලින් ඔහු පිවිසියේ සිය මිතුරා වන දුර්යෝධන්ට ඇය දිනා දෙන්නට වුවද, එයට පංචාලය විරුද්ධ වෙයි. එය අධර්මවාදී බව ඔවුන් පවසයි. එබැවින් දුර්යෝධන් සිය මිතුරාටම ද්‍රෝපදී දිනා ගන්නා ලෙස ආරාධනා කරයි. නැවත තරඟයට පිවිස් කර්ණ අනිවාර්යයෙන් ජය ගන්නා බව ක්‍රිෂ්ණා පවසන බැවින් ද්‍රෝපදී කර්ණ ට තරඟ නොකරන ලෙස විරුද්ධ වෙයි. ඇය ඔහු රජෙකු වුවත් රථාචරියෙකු පුත්‍රයෙකු බව පවසා අවමන් කරයි. කර්ණ තරඟය නවත්වයි. පසුව අර්ජුනා පැමිණ තරඟය දිනයි. එහෙත් ජයග්‍රහණයෙන් අනතුරුව අර්ජුනාට සිය සහෝදරයන් පස්දෙනා අතර ම ද්‍රෝපදී බෙදා ගැනීමට සිදුවෙයි.
ඔට්ටුව දා කර්ණ පිට කරන්නේ ද්‍රෝපදී මහා ජනකායක් ඉදිරියේ තමාට දුන් වේදනාවයි.

5 comments:

  1. කවි පෙල අපූරුයි.

    ජයවේවා!!!

    ReplyDelete
  2. අලුතින් ටෙලිකාස්ට් වෙන එක නෙමේ අක්කෝ පරණ මහාභාරත් ටෙලි එක යූටියුබ් තියෙනවා,චොප්රා බ්‍රදර්ස්ලගේ.ඒක බලන්න.මහාභාරත් කියෙව්වා වගේ තමා.ඒ තරම් කම්ප්ලීට් වර්ෂන් එකක්.

    ReplyDelete
    Replies
    1. මම ඒක බැලුවා. ඒකට වඩා මේක සමීපයි

      Delete
  3. Lassanai.thawa me wage ewa danna.me kathawen

    ReplyDelete
  4. Lassanai.thawa me wage ewa danna.me kathawen

    ReplyDelete

සෑම අදහසක්ම එක සේ වටිනවා..ඕනෑම විදිහකට විඳගන්න...මේ කාටත් අයිති අකුරු. කාගෙ කාගෙත් සිතිවිලි.